Cliente por pidi areglo di pago y pa tene cuenta cu restitucion di inkomstenbelasting

ORANJESTAD – Servicio di Impuesto ta recorda su clientenan kendenan tin debe di belasting atrasa, cu ta sumamente importante pa reacciona riba e debe mas pronto posibel. Ta asina cu un cliente tin e obligacion legal pa cumpli cu pago di un cobransa dentro di e termino cu ley ta indica. Si e pago no sosode debidamente, automaticamente lo start e proceso di cobramento cu gradualmente por bira mas severo. Solamente si cumplimento di e pago ta causa dificultad financiero, por haci peticion pa un areglo di pago. Banda di e posibilidad pa pidi un areglo di pago, un cliente por pidi tambe pa tene cuenta cu posibel restitucion cu e ta spera di inkomstenbelasting, prima di AOV/AWW y/of prima di AZV. Actualmente Servicio di Impuesto por tene cuenta cu posibel restitucionnan te cu aña 2008. Aki ta sigui un splicacion mas amplio.

Kico ta un areglo di pago?
Un areglo di pago ta un combenio entre Servicio di Impuesto y un cliente, unda tur dos partido ta haci un palabracion pa paga e debe atrasa - di un of mas cobransa - dentro di un termino mas largo. Asina e cliente ta haya mas espacio financieramente pa cumpli cu e pagonan.
Si acaso e cliente no cumpli of no a cumpli debidamente cu e palabracion haci, automaticamente ta termina e combenio y Servicio di Impuesto ta cuminsa of sigui cu e proceso di cobramento.

Ta importante pa menciona cu un areglo di pago ta basa riba e debe cu e cliente tawatin na momento cu a cera e areglo. Si acaso despues e cliente a ricibi otro cobransa acerca, esaki no ta cay den e areglo palabra. E cliente lo tin cu paga e cobransa (cu el a ricibi despues) separa di e areglo. Pues un areglo no automaticamente ta conta pa tur cobransa cu sali despues. Si acaso e situacion aki ta trece dificultad financiero, e cliente por acudi na Servicio di Impuesto pa haci un adaptacion den su areglo existente. Den un caso asina lo por cera un areglo nobo basa riba e saldo nobo di e debe na e momento ey.

Ta tene cuenta cu restitucion
Manera menciona na e momentonan aki un cliente por pidi tambe pa tene cuenta cu posibel restitucion. Aki ta trata di cliente cu tin debe habri y no a ricibi e cobransa(nan) definitivo di inkomstenbelasting di e añanan te cu 2008 y ta spera di haya placa bek.
Pa Servicio di Impuesto por tene cuenta cu posibel restitucion, e cliente mester cumpli cu e siguiente condicionnan:
1. E cliente ta haci un peticion por escrito den cual e ta duna un calculacion di e suma di restitucion cu e ta sperando.
2. E cliente mester a entrega tur su declaracionnan (aangiftebiljetten) di inkomstenbelasting te cu aña 2008.

Si e suma di debe ta menos cu e suma di restitucion, e cliente ta haci un peticion pa extension di e periodo di pago. Den e caso aki Servicio di Impuesto ta haci e periodo den cual e pago mester tuma lugar mas largo door di duna e cliente suspension di pago durante e periodo aki. Es decir cu den e periodo aki e cliente no tin mester di haci pago y no lo sigui cu e proceso di cobramento, esta no lo manda por ehempel un aanmaning of un ordo di retencion riba salario.

Ehempel:
Cliente A debe Afl. 500,- na grondbelasting 2009 y ta spera e suma di Afl. 2.000,- na restitucion.
Cliente A por haya extension di periodo di pago te ora su cobransanan definitivo di inkomstenbelasting sali. Durante e periodo aki cliente A no tin mester di haci ningun pago di su grondbelasting 2009.
Ora e cobransanan definitivo di inkomstenbelasting sali, anto automaticamente Servicio di Impuesto lo desconta e suma di Afl. 500,- for di Afl. 2.000,- (restitucion). E cliente lo ricibi e diferencia di Afl. 1.500,- den su man.

Den un otro scenario, por resulta cu e suma di debe ta mas halto cu e suma di restitucion. Den e caso aki e cliente por haci un peticion pa areglo di pago y den e peticion aki e ta pidi tambe pa suspension di pago igual cu e suma di restitucion. Den e caso aki e cliente lo haya un areglo di pago pa e diferencia.

Ehempel:
Cliente B tin debe di erfpacht 2005 te cu 2009 pa e suma di Afl. 3.500,-, mientras e ta spera e suma di Afl. 1.500,- na restitucion.
Cliente B lo haya suspension di pago riba e suma di Afl. 1.500,- y lo haya un areglo di pago pa paga e diferencia esta Afl. 2.000,-. Ora e cobransanan definitivo di inkomstenbelasting sali, anto automaticamente Servicio di Impuesto lo desconta e suma di Afl. 1.500,- for di e restitucion.
Cliente B mester percura si pa cumpli cu e areglo di pago. Si esey no sosode e proceso di cobramento ta sigui. Cliente B por haya un aanmaning y posiblemente un ordo di retencion riba salario pa e suma di Afl. 2.000,- cu e no ta pagando.

Durante tratamento di e peticion pa tene cuenta cu restitucion, semper Servicio di Impuesto ta evalua tambe si e cliente a pidi reduccion di loonbelasting. Den e caso aki ta hopi probable cu e cliente no ta bin na remarca pa restitucion di inkomstenbelasting y consecuentemente Servicio di Impuesto no por duna suspension di pago sino un areglo di pago.

Pesey ta importante pa e cliente demostra claramente cu e ta sperando restitucion di inkomstenbelasting. Eventualmente Servicio di Impuesto lo por desconta e debe for di e futuro restitucion. Si acaso ainda ta keda un saldo pa paga, e ora e cliente lo por haya un areglo pa paga e diferencia di e suma aki. En todo caso suspension y/of areglo di pago no ta sosode automaticamente. E cliente mester actua y haci su peticionnan.

Ta importante pa reacciona
Semper ta importante pa reacciona mesora riba un cobransa. Asina cu un cliente a ricibi un cobransa y e ta di acuerdo cu ne, e tin e deber pa pag’e dentro di e termino legal. Solamente si cumplimento di e pago ta causa dificultad financiero, por haci peticion pa un areglo di pago. Si acaso e cliente no ta di acuerdo cu e cobransa, e por entrega un carta di obhecion. Importante ta pa e cliente reacciona na tempo y no laga e proceso di cobramento cu forsa di ley tuma lugar. Asina e cliente tin chens tambe pa evita paga interes.

Mas informacion
Pa mas informacion e cliente por acudi na e seccion Servicio pa Cliente na oficina principal na Camacuri of na Oficina di gobierno na San Nicolas.

GERENCIA DI SERVICIO DI IMPUESTO
3 di maart 2010