E cobransa ta fecha 28 di juni 2010

ORANJESTAD – Servicio di Impuesto ta informa cu dentro di poco su clientenan lo ricibi e cobransa di grondbelasting di aña 2010 na cas. E cobransa aki ta fecha 28 di juni 2010 y por scohe pa paga esaki den un solo biaha of den termino. E cliente cu no por paga su cobransa dentro di e terminonan legal, por haci un peticion pa areglo di pago. Mester haci e peticion aki mas pronto posibel. Asina e cliente mes por evita cu Servicio di Impuesto ta continua cu e proceso di cobramento cu gradualmente por bira mas severo. Aki ta sigui un splicacion mas amplio encuanto e cobransa di grondbelasting 2010.

Termino di pago
Manera conoci, ley ta permiti pa paga e cobransa den cuatro termino. Cada termino ta igual na un kwartaal (3 luna) y ta caduca e delaster dia di cada kwartaal esta dia 31 di maart, 30 di juni, 30 di september y 31 di december. E termino legal cu a caduca caba na momento cu e cobransa sali, mester wordo paga dentro di un luna despues di fecha di e cobransa.

Pa loke ta e cobransa di aña 2010, e prome y di dos termino di pago ta caduca dia 28 di juli 2010, esta un luna despues di fecha di cobransa. E di dos y di tres termino di pago ta caduca dia 30 di september y 31 di december 2010, esta e delaster dia di cada kwartaal.

Aki ta sigui un skema di e terminonan legal di pago cu ta conta pa e cobransa di aña 2010:

Areglo di pago
Den caso di dificultad financiero, e cliente por acudi na seccion Servicio pa Cliente pa haci un peticion pa areglo di pago di maximo 10 luna. Pa areglo di pago di mas cu 10 luna e cliente mester haci un cita cu un funcionario specialisa den asunto di cobramento, un asina yama “invorderaar”, kende lo atende e cliente personalmente. Servicio di Impuesto ta evalua tur peticion pa areglo y ta dicidi si ta honra e peticion of no.

Posibel restitucion
Servicio di Impuesto por tene cuenta cu posibel restitucion. Pa esaki e cliente mester cumpli cu e siguiente condicionnan:
1. Ta haci un peticion por escrito den cual ta duna un calculacion di e suma di restitucion cu ta sperando.
2. Mester a entrega tur e declaracionnan (aangiftebiljetten) di inkomstenbelasting te cu aña 2008.
Servicio di Impuesto ta evalua e peticion y si honra esaki, e cliente lo paga su cobransa di grondbelasting te ora cu su cobransa definitivo di inkomstenbelasting sali y esaki resulta den restitucion di belasting. Den un caso asina lo desconta e debe di grondbelasting for di e suma di restitucion.

Si e pago no sosode
Den caso cu e cliente no a paga segun e termino legal of areglo of no a paga suficiente, e ora Servicio di Impuesto por cuminsa cu e proceso di cobramento mesora despues cu un termino di pago of areglo caduca. Esaki ta nifica cu no lo tene cuenta mas cu e demas terminonan pa haci e otro pagonan. Pues, practicamente e cliente ta perde su derecho pa paga e resto di e cobransa den e terminonan cu ta sigui. Pesey ta consehabel pa tene cuenta cu e terminonan di pago y haci e pagonan manera ley ta stipula of manera e areglo di pago ta indica. Esaki ta importante pa evita cualkier inconveniencia.

Pa mas informacion encuanto e cobransa of areglo di pago, e cliente por acudi na seccion Servicio pa Cliente na oficina principal na Camacuri 2 of Oficina di Gobierno na San Nicolas.

Pa finalisa, Servicio di Impuesto ta conseha tur cliente pa lesa e texto imprimi riba e cobransa cu hopi atencion y asina e clientenan ta pone nan mes miho na altura tambe di e tipo di cobransa aki.

GERENCIA DI SERVICIO DI IMPUESTO
3 di juni 2010