E fecha oficial di otorgamento ta 1 di juli 2010

ORANJESTAD – Servicio di Impuesto ta informa cu e formularionan di declaracion (aangiftebiljet) di winstbelasting 2009 a sali. Ta trata di e formulario di declaracion pa empresa cu ta cay bou ley di winstbelasting manera un NV. E clientenan cu lo ricibi e formulario ta e empresanan estableci na Aruba, e empresanan di exterior cu tin entre otro establecimento permanente na Aruba y e companianan di seguro.
E pakete cu e clientenan lo ricibi ta contene e formulario di declaracion 2009 y dos formulario como anexo pa declara informacion di e dirigentenan y e accionistanan di e empresa.

E formulario di declaracion tin fecha oficial di otorgamento 1 di juli 2010 y pa e fecha aki tur cliente mester a ricibi esaki. E clientenan tin 2 luna pa yena e formulario y entrega esaki na Servicio di Impuesto. E ultimo dia pa entrega e declaracion ta 1 di september 2010. Ta importante pa tene cuenta cu e termino di 2 luna aki, ya cu e cliente ta core riesgo di haya boet si no entrega e declaracion of si entrega esaki laat.

Servicio di Impuesto ta haci un apelacion na su clientenan pa yena tur e formularionan corectamente y completamente. Despues ta verifica si a contesta tur e preguntanan. Ultimo ta firma y entrega e declaracion na Servicio di Impuesto hunto cu e anexonan esta informacion di dirigente y accionista, relato anual y su respectivo aclaracion y demas documento di importancia.

GERENCIA DI SERVICIO DI IMPUESTO
14 di juni 2010