Diaranson awor ta ultimo dia pa entrega e plachinan di number di vehiculo di motor cu no ta den uzo

ORANJESTAD – Servicio di Impuesto ta participa cu ta posibel pa haya dispensacion di impuesto di vehiculo di motor pa e di tres kwartaal di aña 2010. Esaki ta conta pa cliente cu tin un vehiculo di motor cu no ta den uzo y no lo bay ta den uzo pa un periodo minimo di 3 luna. Pa por haya dispensacion di belasting mester cumpli cu e condicionnan.
Un di e condicionnan ta cu mester entrega e plachinan di number prome cu 1 di juli 2010. Aki ta sigui un splicacion mas amplio.

E condicionnan
E condicionnan pa haya dispensacion di belasting ta:
1. Mester entrega e plachinan di number na Servicio di Impuesto prome cu e kwartaal cuminsa. E di tres kwartaal ta cuminsa dia 1 di juli. Pues e ultimo dia pa entrega e plachinan ta diaranson awor, dia 30 di juni.
2. Ta laga e plachinan aden pa un kwartaal of mas completo durante aña.
3. Ta reserva e number pa e aña fiscal coriente, esta aña 2010.

Entregamento di plachi
Mester acudi na un cahero y pidi un formulario. Pa medio di e formulario e cliente ta declara cu e ta entrega e plachinan di su vehiculo y ta duna un splicacion di e motibonan, por ehempel: pa motibo di biahe largo of vehiculo ta daña. Despues ta firma y entrega e formulario hunto cu e plachinan na e cahero.
Por entrega e plachinan di number sea na oficina principal na Oranjestad of na e oficinanan di gobierno na San Nicolas, Savaneta, Sta. Cruz of Paradera.

Si doño di vehiculo a fayece
Den caso cu doño di e vehiculo a fayece, un miembro di famia por entrega e plachinan of e casa di e fayecido por autorisa un persona pa haya e number. Tambe ta posibel pa e herederonan laga pasa e number riba nomber di e persona cu nan ta desea. Tur e herederonan mester firma pa e traspaso di number y nan ta apodera un persona pa regla esaki. Servicio di Impuesto tin e formulario ‘Verklaring van geen bezwaar bij voertuig overdracht’ cu e herederonan por uza. Despues ta entrega e carta di apoderacion y un notificacion di fayecimento di Censo.

Periodo cu plachi ta keda aden
Un otro condicion pa dispensacion di impuesto ta cu e plachinan mester a keda aden pa e kwartaal (of mas) completo. E dispensacion no ta conta pa cada luna cu e plachi a keda aden sino pa cada kwartaal. Esaki ta nifica cu si busca e plachinan bek durante e kwartaal, toch lo mester paga e belasting di e kwartaal ey completamente.

Por ehempel: si e vehiculo tawata daña den luna di juli y e doño a busca e plachinan bek na augustus, e ora toch e mester paga e impuesto di e di tres kwartaal completamente.

No tin dispensacion cu forsa retroactivo
Debi cu mester paga e impuesto delanta, no ta duna dispensacion cu forsa retroactivo. Pues na e momentonan aki, no por haya dispensacion mas pa e prome y di dos kwartaal (januari te cu juni) di 2010.

Dispensacion no ta conta pa gasto di plachi
E dispensacion ta conta pa e impuesto solamente y no pa gasto di e plachinan. Semper mester paga Afl. 20,- pa gasto di plachi.

Ta reserva e number pa aña 2010
Servicio di Impuesto ta reserva e plachinan di number solamente pa e aña fiscal coriente, esta aña 2010. Durante e periodo aki ta reserva e number tambe pa e doño di vehiculo. Di acuerdo cu ley, e cliente cu no reacciona despues di aña 2010 ta core riesgo di perde su number despues di dia 15 di februari 2011.

Pagamento di belasting ta un deber di nos tur, pero pagamento di mas ta den man di e cliente mes. Pues esnan cu tin un vehiculo cu no ta bay ta den uzo pa minimo e proximo tres lunanan, esaki ta e momento pa actua. Tene cuenta si cu e condicionnan menciona. Si entrega e plachinan di number despues di dia 30 di juni 2010, no por haya dispensacion mas pa e di tres kwartaal.

GERENCIA DI SERVICIO DI IMPUESTO
25 di juni 2010