maandag 26 juli 2010 - Diaranson awor e prome y di dos termino di pago di grondbelasting 2010 ta caduca
ORANJESTAD – Servicio di Impuesto ta informa cu e prome termino di pago di grondbelasting di aña 2010 ta caduca diaranson awor, dia 28 di juli.
E cobransa di grondbelasting 2010 ta fecha 28 di juni 2010 y por scohe pa paga esaki den un solo biaha of den termino. Pa loke ta e cobransa di aña 2010, e prome y di dos termino di pago ta caduca un luna despues di fecha di cobransa, esta dia 28 di juli 2010. E di dos y di tres termino di pago ta caduca dia 30 di september y 31 di december 2010, esta e delaster dia di cada kwartaal.
Aki ta sigui un skema di e terminonan legal di pago:
|
Grondbelasting 2010 fecha 28 di juni 2010
|
|
Termino di pago
|
Ta caduca dia
|
Pago rekeri pa ley
|
|
Di prome y di dos termino
|
28 di juli 2010
|
Pago rekeri ta 50% di e suma di cobransa pa cubri e prome y di dos kwartaal: jan – maart 2010 y april – juni 2010.
|
|
Di tres termino
|
30 di september 2010
|
Pago rekeri ta 25% di e suma di cobransa pa cubri e di tres kwartaal: juli – sept 2010.
|
|
Di cuater termino
(ultimo termino)
|
31 di december 2010
|
Pago rekeri ta 25% di e suma di cobransa pa cubri e ultimo kwartaal: oktober – december 2010.
|
|
Pa dia 31 di december 2010 e cobransa di aña 2010 mester ta completamente paga.
|
Areglo di pago
Den caso di dificultad financiero, e cliente por acudi na seccion Servicio pa Cliente pa haci un peticion pa areglo di pago di maximo 10 luna. Pa areglo di pago di mas cu 10 luna e cliente mester haci un cita cu un funcionario specialisa den asunto di cobramento, un asina yama “invorderaar”, kende lo atende e cliente personalmente. Servicio di Impuesto ta evalua tur peticion pa areglo y ta dicidi si ta honra e peticion of no.
Posibel restitucion
Servicio di Impuesto por tene cuenta cu posibel restitucion. Pa esaki e cliente mester cumpli cu e siguiente condicionnan:
1. Ta haci un peticion por escrito den cual ta duna un calculacion di e suma di restitucion cu ta sperando.
2. Mester a entrega tur e declaracionnan (aangiftebiljetten) di inkomstenbelasting te cu aña 2008.
Servicio di Impuesto ta evalua e peticion y si honra esaki, e cliente lo paga su cobransa di grondbelasting te ora cu su cobransa definitivo di inkomstenbelasting sali y esaki resulta den restitucion di belasting. Den un caso asina lo desconta e debe di grondbelasting for di e suma di restitucion.
Si e pago no sosode
Den caso cu e cliente no a paga segun e termino legal of areglo of no a paga suficiente, e ora Servicio di Impuesto por cuminsa cu e proceso di cobramento mesora despues cu un termino di pago of areglo caduca. Pesey ta consehabel pa tene cuenta cu e terminonan di pago y haci e pagonan manera ley ta stipula of manera e areglo di pago ta indica. Esaki ta importante pa evita cualkier inconveniencia.
Pa mas informacion encuanto e cobransa of areglo di pago, e cliente por acudi na seccion Servicio pa Cliente na oficina principal na Camacuri 2 of Oficina di Gobierno na San Nicolas.
GERENCIA DI SERVICIO DI IMPUESTO
26 di juli 2010