Dialuna ta ultimo dia tambe pa pidi prolongacion di termino

Oranjestad – Servicio di Impuesto ta participa cu dialuna awor, dia 4 di oktober, ta e ultimo dia pa entrega e declaracion di inkomstenbelasting 2009. Mester remarca cu e fecha aki ta conta solamente pa esnan cu a ricibi nan formulario cu fecha oficial di otorgamento: 2 di augustus 2010. Na e clientenan cu no ta alcansa pa entrega e declaracion na tempo, dialuna awor ta e ultimo dia tambe pa haci peticion pa prolongacion di termino.

Na unda por entrega e declaracion?
Por entrega e declaracion na oficina principal na Camacuri of na Oficina di gobierno na San Nicolas durante orario di oficina.

Trece copia
Servicio di Impuesto ta recomenda su clientenan pa trece un copia di e declaracion tambe ora di entregamento pa por pone un stempel riba dje. Esaki ta facilita e entregamento y e copia ta keda tambe como e prueba di entregamento pa e cliente.

Prolongacion di termino
Pa e cliente kende no ta alcansa pa entrega su formulario na tempo, tin posibilidad ainda pa pidi prolongacion di termino. E ultimo dia pa entrega e peticion ta dialuna awor tambe, dia 4 di oktober. No lo honra e peticionnan cu drenta despues di dia 4 di oktober.

Pa haci peticion pa prolongacion di termino, e cliente por yena e formulario “Uitstel indiening aangifte inkomstenbelasting premies volksverzekeringen”. E formulario aki ta obtenibel na oficina principal na Camacuri, Oficina di gobierno na San Nicolas of via e website www.siad.aw. Alabes tin posibilidad di haci peticion door di manda un e-mail. Pa esaki mester yena e formulario digital cu Servicio di Impuesto tin disponibel riba su website. Despues ta mail esaki pa Servicio di Impuesto. Por haya e instruccionnan riba www.siad.aw.
Tur cliente cu a haci un peticion pa prolongacion di termino lo ricibi un contesta por escrito di Servicio di Impuesto.

Cliente nobo
Pa e clientenan nobo cu a registra recientemente, e fecha di 4 di oktober 2010 no ta conta. E termino pa yena y entrega e formulario ta cuminsa core desde fecha di otorgamento registra riba e formulario y ta caduca 2 luna despues.

Un deber di nos tur
Tur cliente cu a ricibi e formulario di declaracion tin e deber di yen’e y entreg’e. Door di yena y entrega e formulario, e cliente ta declara e entrada cu realmente el a gana. Ademas e ta haci uzo di su derecho pa deduci su gastonan cu ta fiscalmente acceptabel.
Si entrega e declaracion laat of keda sin entrega esaki ta nifica cu e cliente ta core risico di haya un cobransa taxativo. E ora inspector mes lo calcula e entrada fiscal na momento cu e ta bay saca e cobransa definitivo. E cobransa taxativo lo inclui boet pa incumplimento. E boet aki ta 5% di e impuesto y ta minimo Afl. 250,- y maximo Afl.10.000,-.

GERENCIA DI SERVICIO DI IMPUESTO
1 di oktober 2010