Specialmente no mester lubida e persoonsnummer

ORANJESTAD – Servicio di Impuesto ta participa na tur cliente cu tin e obligacion di entrega e lista colectivo di salario (verzamelloonstaat) y e lista colectivo di pago na tercera persona (verzamelstaat opgaaf derde) di aña 2008, cu ta sumamente importante pa entrega e listanan menciona corectamente y completamente. Manera comunica anteriormente e ultimo dia pa entrega e documentonan aki ta 31 di maart 2009. E clientenan cu no a ricibi e documentonan menciona via post, mester acudi mas pronto posibel na Servicio di Impuesto y pidi un duplicado.

Lista colectivo di pago di salario
Manera conoci tur doño di trabou cu tin empleado den servicio mester entrega – cada aña den luna di januari - un lista colectivo di pago di salario (verzamelloonstaat) di e aña cu a pasa. Pa medio di e documento aki e cliente ta declara kendenan tawata su empleadonan, ki salario nan a ricibi y cua ta e retencionnan haci. E obligacion aki ta stipula den articulo 49 inciso 2 di e Lei General di Impuesto (ALB).

Lista colectivo di pago na tercera persona
Tur aña – den luna di januari - un empresa mester entrega tambe e lista colectivo di pago haci na tercera persona (verzamelstaat opgaaf derden). E obligacion aki ta stipula den articulo 49 inciso 3 di e Lei General di Impuesto (ALB). Aki ta trata di pagonan haci den e aña anterior na persona individual (cu NO ta den servicio) of empresa, pa trabou haci y pa cual a duna compensacion.

Yena tur dato corectamente y completamente
Ta sumamente importante pa entrega e documentonan menciona completamente y corectamente. Specialmente no mester lubida di menciona e persoonsnummer di cada empleado of tercera persona. Por sosode cu Servicio di Impuesto ta manda e declaracionnan bek pa e cliente si acaso falta informacion.

Prolongacion di termino
Normalmente mester entrega e listanan colectivo menciona den luna di januari. E aña aki Servicio di Impuesto a duna tur cliente dos luna extra y awor e ultimo dia ta 31 di maart proximo. Pues tur cliente a haya 3 luna completo pa por cumpli cu entregamento di e formularionan. Despues di dia 31 di maart Servicio di Impuesto no lo honra eventual peticionnan cu drenta pa prolongacion di termino.

E clientenan cu no a ricibi nan formularionan via post, mester acudi mas pronto posibel na Servicio di Impuesto y pidi un duplicado. Por pasa na e seccion di Informacion sea na oficina principal na Camacuri of na Oficina di gobierno na San Nicolas.

LB-disk 2008
Servicio di Impuesto tin disponibel un file digital yama “LB-disk 2008”. E LB-disk aki ta consisti di un spreadsheet (MS Excel) y ta contene 2 worksheet: uno pa e verzamelloonstaat y uno pa e verzamelstaat opgaaf derden. E clientenan cu NO tin un programa di payroll por haci uzo di e spreadsheetnan aki pa yuda nan yena y/of entrega e documentonan menciona digitalmente. Uzo di e LB-disk 2008 aki no ta obligatorio.
E clientenan por baha e file “LB-disk 2008” for di e website: www.siad.aw. Despues nan ta procesa e datonan uzando nan mesun disk pa e por wordo entrega hunto cu e formularionan original. Mester remarca cu no ta posibel pa uza e LB-disk 2008 pa un otro aña fiscal.

Aclaracion LB-disk 2008
Riba e website di SIAD tin tambe un aclaracion pa yuda e clientenan cu kier uza e LB-disk 2008 (Toelichting LB-disk 2008). Ta consehabel pa consulta e aclaracion aki ya cu e ta contene informacion mas detaya. Den caso cu ainda e cliente no ta sali afo, e ora e por tuma contacto cu Servicio di Impuesto na telefon 522-7423, seccion “Administracion” pa yudansa.

Con por entrega e listanan colectivo?
Tin 2 manera pa entrega e listanan colectivo:
1. e cliente ta yena y entrega e formularionan original cu el a ricibi via post;
2. e cliente ta entrega e informacion den forma digital uzando “LB-disk 2008” of un otro programa di payroll.

E cliente mes ta dicidi si e ta skirbi e datonan na man of e ta procesa esakinan digitalmente.
Si e cliente ta entrega e datonan riba disk, e no tin mester di yena e formulario original.
No ta importa cua forma e cliente ta scohe, pero den tur dos caso, e mester entrega e formulario original firma bek.

Si no entrega e listanan colectivo
Si e cliente no cumpli cu su obligacion di entrega e listanan colectivo menciona, e ta core risico pa haya boet te na un maximo di Afl. 10.000,-. Esaki ta stipula den articulo 56 di Ley di Impuesto General (ALB). Servicio di Impuesto lo impone e boet segun su nota di maneho di boet stipula den paragraf 25 di e documento “Boetebeleid Belastingdienst Aruba 2004”, cual ta disponibel tambe riba e website www.siad.aw. E boet ta depende cuanto empleado of tercera persona e cliente tawatin. E boet ta depende tambe pa kico tawata tin incumplimento: sea ta pa no entregamento, entregamento laat of e formularionan no ta contene tur e datonan rekeri.

Servicio di Impuesto ta conseha e clientenan cu tin e deber di entrega e “verzamelloonstaat” y e “verzamelstaat opgaaf derden”, pa yena e formularionan aki corectamente y completamente y despues entrega nan na tempo. Asina e cliente mes ta evita un posibel boet di incumplimento.

GERENCIA DI SERVICIO DI IMPUESTO
10 di maart 2009