maandag 20 juni 2011 - Lo eherce control na momento di entrega declaracion di winstbelasting 2010
ORANJESTAD – Servicio di Impuesto ta participa cu e aña aki un bes mas lo eherce control riba e formulario di declaracion (aangiftebiljet) di winstbelasting di aña 2010. Esaki ta nifica cu prome cu accepta e declaracion na momento di entregamento, lo controla si esaki ta completamente yena. Si tin mas cu dies (10) declaracion pa entrega, mester haci un cita. Despues di a haci e controlnan necesario, Servicio di Impuesto lo duna e cliente un comprobante di entregamento. Aki ta sigui un splicacion mas amplio.
Control
Prome cu acepta e formulario di declaracion, Servicio di Impuesto lo controla esaki riba e siguiente puntonan:
E formulario ta esun original.
|
Mester entrega e formulario original bek. E formulario original tin un label y barcode riba dje.
Si a uza un programa pa yena e formulario digital, por pone un printout como anexo na e formulario original.
|
|
No a haci cambio riba e formulario.
|
No lo accepta e declaracion si tin cualkier cambio den e 'header' di e formulario. No por cambia por ehempel e datonan di e cliente of e aña fiscal.
|
|
E declaracion original ta firma.
|
Mester firma e declaracion original. Si un consehero ta bay firma e declaracion pa su cliente, mester tin un carta di apoderacion acerca.
|
|
Tur suma ta na florin di Aruba.
|
No ta acepta e declaracion si a yena e sumanan na dollar Mericano, Euro of otro moneda.
|
|
Number di telefon ta yena.
|
Menciona por lo menos un number di telefon den e declaracion.
|
|
Tur seccion cu ta aplicabel pa e empresa ta yena.
|
Cualkier seccion cu no ta yena lo causa cu no por entrega e declaracion.
E seccionan cu ta forma parti di:
a. activa y pasiva di empresa (fiscale vermogensopstelling)
y
b. calculacion di ganashi fiscal (fiscale winstberekening), mester ta yena.
NO lo accepta e declaracion si:
1. e empresa tawata activo den aña 2010 y no a contesta pregunta 8a, 8b of 8c y e declaracion no ta contene e sumanan necesario;
2. na un seccion a yena un suma total solamente y pues no a yena e seccion completamente;
3. a laga e seccionnan habri y a referi na e cuenta anual.
|
|
A entrega e cuenta anual como anexo na e declaracion.
|
Ta obligatorio pa entrega e cuenta anual di e empresa.
Si acaso un empresa no tawata activo den aña 2010 of pa ekibocacion a ricibi un formulario di declaracion, e ora por indica esaki riba e prome pagina di e formulario. Den e caso aki no tin mester di entrega e cuenta anual, pero si mester firma e formulario di declaracion y entrega esaki bek.
|
|
E anexonan ta contene tur dato di e empresa.
|
Menciona riba tur anexo:
1. e nomber di empresa;
2. e 'persoonsnummer' di empresa;
3. e seccion na cual e anexo ta referi.
|
Ta sumamente importante pa cumpli cu tur e puntonan menciona. Asina e cliente ta evita cu Servicio di Impuesto ta debolbe su declaracion bek. Si e declaracion ta completo y corecto, e procesamento tambe por sosode lihe despues.
Entregamento
Por entrega e declaracion na oficina principal na Camacuri of Oficina di gobierno na San Nicolas.
E conseheronan of representantenan cu tin mas cu dies declaracion pa entrega, mester haci un cita via e-mail: aangifte@siad.aw. Menciona den e e-mail cuanto declaracion ta bay entrega. Servicio di Impuesto lo contesta via e-mail ki dia y ki ora por acudi pa entrega e declaracionnan.
Comprobante di entregamento
Ta duna comprobante di entregamento despues cu a controla e declaracion. Servicio di Impuesto no ta duna comprobante si a deposita e declaracion den postbus.
Alabes por stempel e copia di declaracion pa esaki keda como comprobante di entregamento pa e cliente. Ta remarca cu e cliente mes mester percura pa saca copia di tur su documentonan. Servicio di Impuesto no ta duna servicio di saca copia.
Ultimo dia pa entrega declaracion
E ultimo dia pa entrega e declaracion di winstbelasting 2010 ta 1 di augustus 2011. Ta consehabel pa entrega e declaracion mas pronto posibel y no warda te na ultimo.
Mester tene na cuenta cu ta tuma tempo pa eherce e control. Si warda te na ultimo ta nifica haya un cita mas laat of para den rij y e ora e tempo di espera ta bira mas largo tambe.
Servicio di Impuesto ta haci un apelacion na tur cliente y specialmente e conseheronan fiscal of representantenan, pa cuminsa entrega e declaracionnan di awor caba teniendo debido cuenta cu tur e puntonan menciona akiriba. Asina despues Servicio di Impuesto por procesa e declaracionnan mas rapido y evita atraso.
GERENCIA DI SERVICIO DI IMPUESTO
20 di juni 2011