E fecha oficial di otorgamento ta 1 di september 2011

ORANJESTAD – Servicio di Impuesto ta informa cu e formularionan di declaracion di inkomstenbelasting 2010 a sali. Ta trata aki di e formulario di declaracion pa persona residencia na Aruba. Durante luna di augustus e clientenan lo ricibi nan formulario via post manera custumber. E fecha oficial di otorgamento ta 1 di september 2011 y pa e fecha aki tur cliente mester tin nan formulario den man. Un cliente ta haya 2 luna pa yena y entrega su formulario y e ultimo dia pa entrega esaki ta 1 di november 2011.

Prepara documento
Servicio di Impuesto ta recomenda pa cuminsa prepara tur documento necesario relaciona cu entrada y gasto di aña 2010 por ehempel: salario anual, pension di trabou, pension di biehes, pension di viudo of pension di huerfano, entrada di huur di propiedad, entrada di ‘side-jobs’, carta di interes di banco y/of otro instancia, seguro di bida, comprobante di donacionnan haci, comprobante di gastonan di scol di yiu cu ta studia den exterior etc.

Empresa propio
Servicio di Impuesto ta pidi tur cliente cu tin un empresa propio (eenmanszaak), pa nan tambe prepara nan relato anual di aña 2010. Den caso cu e cliente mes no por traha e relato anual aki, ta recomendabel pa busca un consehero.

Trece copia
Semper mester entrega e formulario original bek na Servicio di Impuesto. Ta recomendabel pa ora di entregamento, trece tambe un copia di e declaracion. Asina e cliente por haya un stempel riba su copia cual ta indica e prueba di entregamento.

Yena y entrega e formulario ta un obligacion legal. Door di yena y entrega e formulario na tempo, e cliente ta evita cu e ta haya un cobransa (taxativo) cu boet. E boet ta 5% di e suma di belasting y ta minimo Afl. 250,- y maximo Afl. 10.000,-. Ademas pa medio di e declaracion, e cliente ta haya e oportunidad pa haci uzo di su derecho di deduci su gastonan.

GERENCIA DI SERVICIO DI IMPUESTO
29 juli 2011