Servicio di caha lo ta non-stop

ORANJESTAD – Servicio di Impuesto ta participa cu diamars 6 di december, clientenan por cuminsa haci pago delanta di impuesto di vehiculo di motor (motorrijtuigenbelasting) di aña 2012. E clientenan por haci pago tanto na Servicio di Impuesto mes of via banco. E clientenan cu ta desea di paga via banco mester tene cuenta cu e condicionan prome cu haci pago.
Ta solamente posibel pa cumpra y busca plachi di number si e adres di e cliente ta registra na Servicio di Impuesto.
Pa loke ta trata e plachinan di number ta necesario pa presenta e prueba di pago y e prueba di seguro valido na momento di busca e plachinan.
Pa aña 2012 e color di e plachinan di number ta fondo blanco cu letter y/of cifra bruin.

E adres di e cliente mester ta registra na Servicio di Impuesto
Ta solamente posibel pa cumpra y busca plachi di number si e adres di e cliente ta registra na Servicio di Impuesto. Si e cliente no sa si su adres ta registra, e por tuma contacto via number di telefon
522-7423 ext. 679, 686 of 713. Pa registra e adres e cliente por usa e formulario ‘Opgaaf of wijziging adres & telefoon’. E formulario ta obtenibel na tur balie di Servicio di Impuesto of riba nos website www.siad.aw.

Pago na Servicio di Impuesto
E cliente cu ta desea di paga na Servicio di Impuesto por haci esaki sea na oficina principal na Camacuri of na un di e oficinanan di gobierno na San Nicolas, Santa Cruz, Savaneta of Paradera.

Orario di caha
Na Camacuri di dialuna pa diabierna: mainta di 7:45 pa 3:30 non-stop.
Na Oficina di gobierno San Nicolaas, Santa Cruz, Savaneta of Paradera di dialuna pa diabierna: mainta di 8:30 pa 2:45 non-stop.

Con por haci pago?
E cliente por paga sea cu placa cash, “debit card” (maestro), bankcheque of kassiercheque. Tene cuenta cu pa impuesto di vehiculo di motor no ta posibel pa paga cu cheque personal.

Rekisitonan ora di haci pago
Pa haci e servicio mas eficiente y lihe Servicio di Impuesto ta pidi su clientenan pa no lubida di trece:
1. Prueba di registro di e vehiculo di Servicio di Impuesto.
2. Recibonan di pago di aña 2011.
3. Permiso valido pa plachi B, TX, V, O y T.

E clientenan cu ainda debe impuesto di aña 2011 lo mester caba di paga esaki prome cu paga e impuesto di aña 2012.
Pa plachi di number cu ta exigi un permiso (vergunning) manera bus, taxi, v-auto, plachi “O” y “T”, e cliente/portador di e permiso por haci pago unicamente na e oficinanan di Servicio di Impuesto. Esaki ta pa motibo cu mester controla si e permiso ta valido na momento di haci pago. Si e permiso no ta valido e cliente no por paga e impuesto. Den un caso asina e cliente mester regla su permiso na DOPV prome.

Prueba di seguro valido
Tur cliente mester tene na cuenta cu su vehiculo mester ta sigura sino e no por ricibi su plachinan di number. E seguro mester ta valido entrante 3 di januari 2012. Esaki ta nifica cu si e seguro ta caduca prome cu e fecha aki, e cliente no lo ricibi su plachinan.

Pago via banco
E clientenan por haci pago via banco tambe. Den e caso aki e siguiente condicionnan ta aplicabel.
1. E cliente ta paga unicamente e impuesto di aña 2012. No ta permiti pa paga e impuesto di dos of mas aña fiscal den un solo transaccion.
2. E cliente mester paga e impuesto y gastonan di plachi di ful e aña 2012. No por haci pago pa solamente un of mas kwartaal di aña 2012.
3. E cliente mester tin e impuesto di aña 2011 completamente paga. Si ainda e cliente no a caba di paga e impuesto di aña 2011, e ora e mester acudi na Servicio di Impuesto pa haci pago.
4. Pa plachi cu ta exigi un permiso (B-TX-T-O-V) no ta posibel pa haci pago via banco.
5. No ta permiti pa paga e impuesto di dos of mas number den un solo transaccion.
6. Pa esnan cu ta paga via internet, mester tene cuenta cu e opcion di pago via “bill payment” no ta posibel. Si ta posibel pa haci transferencia (funds transfer) pa cuenta di Servicio di Impuesto cu e descripcion menciona akibou.

Con ta haci pago via “bank transfer” (internet)?
Pa pago via banco e cliente ta sigui e siguiente pasonan.