No tin mester di haci peticion pa prolongacion di termino

ORANJESTAD – Servicio di Impuesto ta participa cu ta prolonga e termino pa entrega e lista colectivo di salario (verzamelloonstaat) y e lista colectivo di pago na tercera persona (verzamelstaat opgaaf derden) di aña 2011. E ultimo dia pa entrega e listanan aki ta 2 di april proximo. E prolongacion di termino aki ta conta automaticamente pa tur cliente. Pues no tin mester di entrega un peticion pa prolongacion di termino.

Normalmente mester entrega e listanan menciona dia 31 di januari proximo, pero debi cu a haya tardansa pa cu publicacion di e version digital di e listanan riba website, a dicidi di prolonga e termino pa tur cliente. Asina e clientenan por haya mas tempo pa yena nan listanan corectamente y completamente.

Mester remarca cu ta duna e prolongacion di termino un biaha so y pesey Servicio di Impuesto ta haci un apelacion na tur cliente pa entrega e listanan menciona na tempo y no warda te na ultimo. Mester tene na cuenta cu ta tuma tempo pa controla e listanan na momento di entregamento. Si warda te na ultimo ta nifica e tempo di espera ta bira mas largo y menos tempo pa haci coreccion.

GERENCIA DI SERVICIO DI IMPUESTO
30 di januari 2012