No lo duna mas prolongacion di termino

ORANJESTAD – Servicio di Impuesto ta recorda su clientenan cu tin e obligacion di entrega e lista colectivo di pago di salario (verzamelloonstaat) y e lista colectivo di pago na tercera persona (verzamelstaat opgaaf derde) di aña 2008, cu e ultimo dia pa entrega e documentonan aki ta diamars, dia 31 di maart.

Yena tur dato corectamente y completamente
Ta sumamente importante pa entrega e documentonan menciona completamente y corectamente yena. Specialmente no mester lubida di menciona e persoonsnummer di cada empleado of tercera persona. Por sosode cu Servicio di Impuesto ta manda e declaracionnan bek pa e cliente si acaso falta informacion.

Prolongacion di termino
Normalmente mester entrega e listanan colectivo menciona den luna di januari. E aña aki Servicio di Impuesto a duna tur cliente dos luna extra. Pues tur cliente a haya 3 luna completo pa por cumpli cu entregamento di e formularionan. Despues di dia 31 di maart Servicio di Impuesto no lo honra eventual peticionnan pa prolongacion di termino.

Con por entrega e listanan colectivo?
Tin 2 manera pa entrega e listanan colectivo:
1. e cliente ta yena y entrega e formularionan original cu el a ricibi via post;
2. e cliente ta entrega e informacion den forma digital uzando “LB-disk 2008” of un otro programa di payroll.

E cliente mes ta dicidi si e ta skirbi e datonan na man of e ta procesa esakinan digitalmente.
Si e cliente ta entrega e datonan riba disk, e no tin mester di yena e formulario original.
No ta importa cua forma e cliente ta scohe, pero den tur dos caso, e mester entrega si e formulario original firma bek.

Si no entrega e listanan colectivo
Si e cliente no cumpli cu su obligacion di entrega e listanan colectivo menciona, e ta core risico pa haya boet te na un maximo di Afl. 10.000,-. Esaki ta stipula den articulo 56 di Ley di Impuesto General (ALB). Servicio di Impuesto lo impone e boet segun su nota di maneho di boet stipula den paragraf 25 di e documento “Boetebeleid Belastingdienst Aruba 2004”, cual ta disponibel tambe riba e website www.siad.aw. E boet ta depende cuanto empleado of tercera persona e cliente tawatin. E boet ta depende tambe pa kico tawata tin incumplimento: sea ta pa no entregamento, entregamento laat of e formularionan no ta contene tur e datonan rekeri.

Servicio di Impuesto ta conseha e clientenan cu tin e deber di entrega e “verzamelloonstaat” y e “verzamelstaat opgaaf derden”, pa yena e formularionan aki corectamente y completamente y despues entrega nan na tempo. Asina e cliente mes ta evita un posibel boet di incumplimento.

GERENCIA DI SERVICIO DI IMPUESTO
30 di maart 2009