ORANJESTAD – Servicio di Impuesto ta informa cu mientrastanto e cobransanan di grondbelasting di aña 2009 - fecha 30 di juni 2009 - a sali. Un cliente por scohe pa paga su cobransa den un solo biaha of den termino. Pa e cobransa di aña 2009 e clientenan tin tres termino legal di pago. E cliente cu no por paga su cobransa dentro di e terminonan legal, por haci un peticion pa areglo di pago. Mester haci e peticion aki mas pronto posibel. Asina e cliente mes por evita cu Servicio di Impuesto ta continua cu e proceso di cobramento cu gradualmente por bira mas severo. Pues e cliente mes por evita un aanmaning, ordo di retencion riba salario, dwangschrift etc.
Aki ta sigui un splicacion mas amplio encuanto pago di grondbelasting 2009.
Termino legal di pago
Manera conoci, ley ta permiti pa paga e cobransa den cuatro termino. Cada termino ta igual na un kwartaal (3 luna) y ta caduca e delaster dia di cada kwartaal esta dia 31 di maart, 30 di juni, 30 di september y 31 di december. E termino legal cu a caduca caba na momento cu e cobransa sali, mester wordo paga dentro di un luna despues di fecha di e cobransa.
E cobransa di aña 2009 ta fecha 30 di juni 2009. Pues na e momentonan aki ya e prome y e di dos termino di pago aki a pasa pa cual motibo e pago di e terminonan ey ta caduca un luna despues di fecha di e aanslag, esta dia 30 di juli 2009. E di tres kwartaal ta caduca dia 30 di september 2009 y e di cuater kwartaal ta caduca dia 31 di december 2009.
Aki ta sigui un skema di e terminonan legal di pago cu ta conta pa e cobransa di aña 2009:
|
Grondbelasting 2009 fecha: 30 di juni 2009
|
|
Termino di pago
|
Ta caduca dia
|
Pago rekeri pa ley
|
|
Di prome y di dos termino
|
30 di juli 2009
|
Pago rekeri ta 50% di e suma di cobransa pa cubri e prome y di dos kwartaal: jan – maart 2009 y april – juni 2009.
|
|
Di tres termino
|
30 di september 2009
|
Di tres termino 30 di september 2009 Pago rekeri ta 25% di e suma di cobransa pa cubri e di tres kwartaal: juli – sept 2009.
|
|
Di cuater termino (ultimo termino)
|
31 di december 2009
|
Pago rekeri ta 25% di e suma di cobransa pa cubri e ultimo kwartaal: oktober – december 2009.
|
|
Pa dia 31 di december 2009 e cobransa di aña 2009 mester ta completamente paga.
|
Si e pago no sosode (na tempo)
E terminonan menciona ta e terminonan legal di pago cu ta conta pa e cobransa di aña 2009. Den caso cu e cliente no a paga of no a paga suficiente manera rekeri pa ley, e ora Servicio di Impuesto por cuminsa cu e proceso di cobramento mesora despues cu un termino di pago caduca. Esaki ta nifica cu no lo tene cuenta mas cu e demas terminonan legal pa haci e otro pagonan. Pues, practicamente e cliente ta perde su derecho pa paga e resto di e cobransa den e terminonan legal cu ta sigui. Pesey ta consehabel pa tur cliente tene cuenta cu e terminonan legal aki y haci e pagonan manera ley ta stipula. Esaki ta importante pa evita cualkier inconvenencia.
Areglo di pago
Den caso cu e terminonan legal di pago ta causa dificultad financiero, e cliente por acudi na Servicio di Impuesto pa haci un peticion pa areglo di pago. Na seccion Servicio pa cliente, e cliente por haci un peticion pa areglo di pago di maximo 10 luna. Pa areglo di pago di mas cu 10 luna e cliente mester haci un cita cu un funcionario specialisa den asunto di cobramento, un asina yama “invorderaar”, kende lo atende e cliente personalmente. Servicio di Impuesto ta evalua tur peticion y ta dicidi si ta honra e peticion of no.
Mas informacion
Pa mas informacion encuanto areglo di pago, e cliente por acudi na seccion Servicio pa cliente na oficina principal situa na Camacuri 2 of na Oficina di gobierno na San Nicolas.
Pa finalisa, Servicio di Impuesto ta conseha tur cliente pa lesa e texto imprimi riba e cobransa cu hopi atencion y asina e clientenan ta pone nan mes miho na altura tambe di e tipo di cobransa aki.
GERENCIA DI SERVICIO DI IMPUESTO
29 di mei 2009