Aruba a negosha otro acuerdo internacional importante riba tereno fiscal

Oranjestad – Dia 25 y 26 di mei ultimo SIAD a ricibi un delegacion for di Canada cu a bin Aruba pa negosha un tratado fiscal, e asina yama Tax Information Exchange Agreement (TIEA).
E delegacion di Canada tawata consisti di sr. Alain Castonguay y sr. Parry Athenaios di Departamento di Finansas di Canada y sra. Stephanie Smith di Agencia di Impuesto di Canada. Di Aruba a tuma parti na e negoshacionnan, Director di SIAD, sra. mr. Ritza Lopez-Hernandez y sra. mr. Anita Stock-ten Hove di SIAD y sra. Luenne Gomez-Pieters di Servicio di Impuesto.

Un TIEA ta un tratado entre paisnan cu e meta pa stimula e cooperacion internacional riba tereno fiscal
door di intercambia informacion. A base di un tratado asina, Canada por intercambia informacion cu Aruba si e informacion aki ta relevante pa un aplicacion corecto di e leynan nacional di belasting.
Por ehempel: si un compania mama cu ta estableci na Canada, a ricibi dividend di un compania stranhero afilia cu ta opera na Aruba, e ora e compania mama no lo mester paga belasting na Canada riba e dividend ricibi. Pues door di cera un TIEA cu Canada esaki por favorece invershon na Aruba for di Canada.

E negoshacionnan a bay hopi bon y ambos pais a yega na un acuerdo relaciona cu e texto di e TIEA. Tanto Aruba como Canada ya a inicia e proceso pa e TIEA por wordo firma mas pronto posibel. Di parti di Aruba mester haya aprobacion prome di Conseho di Minister di Reino pa e ministro encarga cu asunto di belasting por firma e TIEA.

Ministro di Finansas y Economia, sr. Nilo Swaen, a haya e oportunidad pa topa cu e delegacion di Canada y a gradici nan pa nan interes pa conclui un TIEA cu Aruba. Aruba ta trahando duro pa cera TIEA cu diferente otro pais. Aruba tin tratado di intercambio di informacion caba cu Hulanda, Antias Hulandes, Merca y Spaña. Ademas di Canada pronto Aruba lo firma acuerdo tambe cu Australia, New Zealand, Noruega, Dinamarca, Finlandia, Suecia, Groenland, IJsland y Faroes Islands. Aruba ta bezig tambe ta negoshando mas TIEA cu Alemania y Mexico. Esaki ta haci cu pronto Aruba lo surpasa e cantidad di TIEA, esta 12, cu OECD (Organisacion for Economic Cooperation and Development) a exigi pa no aparece riba nan “grey list”.


GERENCIA DI SIAD
8 di juni 2009