Despues cu minister Swaen a firma diferente tratado fiscal, internacionalmente no ta considera Aruba mas como un paraiso fiscal

Oranjestad – Na nomber di Minister di Finansas y Asunto Economico, Su Excelencia sr. Nilo Swaen, SIAD ta participa cu entrante 10 di september 2009, Aruba a wordo poni riba e lista "blanco" di Organisacion pa Cooperacion Economico y Desaroyo (OECD). E lista aki ta duna e hurisdiccionnan cu ta cumpli cu e standaardnan fiscal internacional cu OECD ta stipula. Aruba ta cumpli cu e standaardnan fiscal aki despues cu dia 10 di september 2009 na Paris, Minister di Finansas y Asunto Economico a firma 7 tratado fiscal, asina yama "Tax Information Exchange Agreement" (TIEA) cu Noruega, Suecia, Finlandia, Dinamarca, Islandia, Groenlandia y Islanan Feroe, cualnan hunto yama tambe Paisnan Nordico.

Banda di a firma e tratadonan cu Paisnan Nordico, Minister di Finansas y Asunto Economico a firma un TIEA cu Islanan Virgen Britanico y Saint Kitts & Nevis. E acto di firmamento aki a tuma lugar dia 11 di september 2009 na Den Haag.

Pues Aruba ya no ta aparece riba e lista gris di OECD y internacionalmente no ta considera Aruba mas como un paraiso fiscal. Pa Aruba esaki ta un logro importante riba tereno fiscal.

GERENCIA DI SIAD
NA NOMBER MINISTER DI FINANSAS Y ASUNTO ECONOMICO
11 di september 2009