E cliente ta haya su pakete personalmente

ORANJESTAD – Servicio di Impuesto ta recorda tur cliente cu tin e obligacion di haci declaracion di loonbelasting, BBO, logeerbelasting y speelvergunningsrecht cu ya por busca e pakete cu ta contene e documentonan valido pa aña 2010, na Servicio di Impuesto na Camacuri.

Ta asina cu tur fin di aña Servicio di Impuesto ta otorga un pakete cu ta contene tur e documentonan necesario pa e diferente tiponan di belasting menciona ariba por ehempel: e declaracionnan (aangifte) mensual di aña 2010, guia aclaratorio, e lista colectivo di salario 2009 (verzamelloonstaat) of e lista colectivo di pago haci na tercera persona 2009 (verzamelstaat opgaaf derden). Contrario na den pasado cu e clientenan tawata ricibi nan pakete(nan) via post, e biaha aki Servicio di Impuesto mes lo duna e cliente su pakete(nan) personalmente.

Busca e pakete
E cliente ta acudi personalmente na Camacuri, na e local situa banda di esun unda ta busca plachi di number di auto.
E orario lo ta mainta di 8:00 pa 12:00 y atardi di 1:00 pa 4:00.

Rekisitonan
Pa un cliente por ricibi su pakete sea di loonbelasting, BBO, logeerbelasting y/of speelvergunningsrecht, e mester cumpli cu e siguiente rekisitonan.
 

Na e conseheronan
E conseheronan fiscal y e oficinanan di accounting tambe por busca e pakete(nan) pa nan clientenan. Den e caso aki di awor caba e consehero por haci un peticion y asina Servicio di Impuesto ta cuminsa prepara su paketenan. Aki ta sigui e rekisitonan cu cualnan mester tene cuenta.

1. E consehero ta haci peticion via e-mailadres: LB-BBOpakket@siad.aw (no por manda e peticion via fax).
2. Hunto cu e peticion ta manda tambe un lista cu nomber di tur e clientenan hunto cu nan persoonsnummer.
3. E consehero ta manda e cartanan di apoderacion (firma) di su clientenan hunto cu e mail. Por presenta cu e cartanan di apoderacion aki tambe na momento di busca e paketenan.
4. Den e mail e consehero ta indica tambe kende ta su persona di contacto y e number di telefon.
5. Servicio di Impuesto mes ta informa e consehero via mail ki dia y ki ora e por busca e paketenan.

Mas informacion
Pa mas informacion relaciona cu e paketenan di loonbelasting, BBO, logeerbelasting y speelvergunningsrecht, por yama e seccion encarga na e liña directo: 522-7433.

Pa evita inconveniencia Servicio di Impuesto ta pidi tur cliente pa tene cuenta cu e cambio den otorgamento di e pakete(nan). Alabes Servicio di Impuesto ta pidi su clientenan pa cumpli cu tur e rekisitonan na momento di haci peticion of busca e pakete, pasobra Servicio di Impuesto lo controla si ta cumpli cu e rekisitonan. De lo contrario e cliente of consehero lo no por ricibi su pakete(nan).

GERENCIA DI SERVICIO DI IMPUESTO
5 di januari 2010