E clientenan mes mester baha e documento aki di internet

ORANJESTAD – Servicio di Impuesto ta participa na tur cliente cu na e momentonan aki ta pidiendo pa e “werknemersverklaring” di aña 2010, cu e documento aki ta riba e website www.siad.aw. Por haya e documento via: downloaden/zakelijk/formulieren en toelichtingen/loonbelasting. Na unda tin e titulo “Loonbelasting 2009/2010” tin un lista di documento entre otro e werknemersverklaring menciona. Servicio di Impuesto a inclui un ehemplar di e documento aki tambe den e pakete di loonbelasting. Si acaso un cliente tin mester di mas ehemplar di e werknemersverklaring 2010, e cliente mes tin cu baha e cantidad necesario di internet pa su uzo. Pues por uza e version di internet libremente.

Ta obligatorio pa yena e werknemersverklaring
Un werknemersverklaring ta un formulario cu e doño di trabou ta laga su empleado yena pa e por sa e situacion personal di e empleado y asina haya sa cua tarifa di loonbelasting mester aplica.
Pa ley e empleado tin e obligacion di haci declaracion pa medio di e formulario. Si no yena e werknemersverklaring debidamente of nenga di yena esaki, e doño di trabou ta autorisa pa retene loonbelasting segun e tarifa mas halto y no lo tene cuenta cu eventual deduccion pa yiu.

Na ki momento ta laga e empleado haci declaracion?
E doño di trabou ta laga su empleado haci declaracion:
1. riba e dia cu e empleado a drenta den servicio of
2. na momento cu e situacion personal di e empleado a cambia. Aki ta importante pa declara si e estado civil a cambia (e empleado a casa of separa) of a haya yiu. Alabes ta importante pa e doño di trabou sa si e pareha di su empleado tin entrada di empresa of trabou.
Tur esakinan ta importante pa finalmente determina e tarifa di loonbelasting cu mester retene for di salario di e empleado.

Pakete di loonbelasting
Alabes Servicio di Impuesto ta recorda e clientenan di loonbelasting cu ya nan por busca nan pakete di loonbelasting na oficina di Servicio di Impuesto na Camacuri, na e edificio anexo, local banda di unda ta busca number di auto.

GERENCIA DI SERVICIO DI IMPUESTO
7 di januari 2010